दाता सम्मेलन कार्यक्रममा भाग लिन हलिवउड नायक लियो नार्दो डिक्याप्रियो र हलिउडका चर्चित बेलायती नायिका जोहना लुम्ले नेपाल आउने

टाइटेनिक फिल्मका नायक लियो नार्दो डिक्याप्रियो र हलिउडका चर्चित बेलायती नायिका जोहना लुम्ले नेपाल आउने भएका छन् । सम्मेलनमा भाग लिन अमेरिकी पूर्व राष्ट्रपति जिम्मी कार्टर पनि नेपाल आउने निश्चित भएको छ । 

 

भूकम्पपछिको पुर्ननिर्माणमा सहयोग जुटाउन असार १० गते सरकारले आयोजना गरेका दाता सम्मेलन कार्यक्रममा भाग लिनउ उनिहरु नेपाल आउन लागेका हुन् । एक दिने सो सम्मेलनमा नेपाल र विदेशका गरी ३०० जना सहभागी हुने परराष्ट्र मन्त्रालयले जानकारी दिएको छ । 

 

सम्मेलनमा चीन र भारतका विदेश मामिला मन्त्रीहरु क्रमशः वाङ वी र सुष्मा स्वराज सहभागी हुने निश्चित भएको सरकारले जनाएको छ । अर्थमन्त्रालयले दिएको जानकारीअनुसार बङ्गलादेशका अर्थमन्त्री अबुल माल अब्दुल महिथ र नर्वेका अन्तर्राष्ट्रिय विकास मन्त्री हेक्की होलाम्स सहभागी हुने निश्चित भएको छ । 

 

त्यसैगरी, एसियाली विकास बैंकका अध्यक्ष, विश्व बैंकका उपाध्यक्ष र जापानका राज्यमन्त्रीले सम्मेलनमा भाग लिने बताइएको छ । त्यस्तै, युरोपेली सङ्घबाट उच्च अधिकारीले सम्मेलनमा सहभागिता जनाउन छन् ।  

 

महाविपत्तिबाट भौतिक संरचनामा पुगेको क्षतिलाई पूर्ववत् अवस्थामा फर्काउन आफ्नै साधन स्रोतले सम्भव नहुने भएपछि अन्तर्राष्ट्रिय दातृ निकायको सम्मेलन गर्नु परेको सरकारको भनाइ छ । सरकारले सम्मेलनको तयारीका लागि अर्थमन्त्री डा रामशरण महतको संयोजकत्वमा सम्मेलन तयारी समिति गठन गरेको छ । सम्मेलन तयारी लगभग अन्तिम चरण पुगेको छ । 

 

सरकारले निमन्त्रणा पठाएका द्विपक्षीय दातृ निकाय तथा मुलुकहरु अस्ट्रेलिया, अस्ट्रिया, बङ्गलादेश, बेल्जियम, भुटान, ब्राजिल, चीन, डेनमार्क, संयुक्त अधिराज्य, फिनल्यान्ड, फ्रान्स, जर्मनी, इजरायल, जापान, नर्वे, विकासका लागि साउदी कोष, श्रीलङ्का, स्विडेन, स्विट्जरल्यान्ड, थाइल्यान्ड, नेदरल्यान्ड, संयुक्त राज्य अमेरिका, पोल्यान्ड, भारत, न्युजिल्यान्डले आजसम्म आफ्नो सहभागिता हुने निश्चित गरिसकेका छन् । 

 

त्यसैगरी, मलेसिया, कतार, अफगानिस्तान, क्यानाडा, चेक रिपब्लिक, इन्डोनेसिया, अरब आर्थिक विकासका लागि कुवेती कोष, लग्जम्बर्ग, माल्दिभ्स, पाकिस्तान, रुस, स्पेन, टर्की, युनाइटेड अरब इमिरेट्सलगायतका द्विपक्षीय मुलुकको सहभागिता भने केही दिनभित्रै निश्चित हुनेछ । 

 

युरोपेली सङ्घ, अन्तर्राष्ट्रिय मुद्रा कोष (आइएमएफ), अन्तर्राष्ट्रिय आप्रवासन सङ्गठन, राष्ट्र सङ्घीय महिला सङ्गठन (युएन ओमन), राष्ट्र सङ्घीय विकास कोष (युएनडिपी), राष्ट्र सङ्घीय शैक्षिक, वैज्ञानिक तथा सांस्कृतिक सङ्गठन (युनेस्को), राष्ट्र सङ्घीय जनसङ्ख्या कोष (युएनएफपिए), शरणार्थीका राष्ट्र सङ्घीय उच्चायोग, राष्ट्र सङ्घीय बाल कोष, संयुक्त राष्ट्र सङ्घ, संयुक्त राष्ट्र सङ्घ बसोबास केन्द्र (युएन ह्याभिट्याट), विश्व स्वास्थ्य सङ्गठन (डब्लुएचओ), विश्व बैंक, एसियाली विकास बैंक, विश्व खाद्य सङ्गठन (एफएओ) लगायत बहुपक्षीय निकायले सम्मेलनमा सहभागी हुने प्रतिनिधिको टुङ्गो लगाइसकेका छन् । 

 

सम्मेलनमा प्रधानमन्त्री सुशील कोइरालाले मन्तव्यसहित उद्घाटन गरेपछि सहभागीहरुलाई भूकम्प अघि र पछिको नेपालका प्रमुख गन्तव्यस्थलको दृश्य समेटिएको वृत्तचित्र देखाइनेछ । सम्मेलनको उद्घाटनभन्दा कार्यसत्रलाई जोड दिइने र नेपालको तर्फबाट प्रस्ताव गरिने कार्ययोजना प्रस्तुत गर्दै दाताको सुझाव लिने प्रयास गरिनेछ । सरकारले सहभागी हुने अतिथिको बसोबास तथा सुरक्षाको पूर्ण प्रबन्ध भइसकेको जनाएको छ । 

 

त्यस्तै, विकासका लागि जापान अन्तर्राष्ट्रिय सहयोग नियोग (जाइका), विकासका लागि अमेरिकी सहयोग नियोग (युएसआइडी), अन्तर्राष्ट्रिय विकासका लागि कोरियाली सहयोग नियोग (कोइका), अन्तर्राष्ट्रिय रेडक्रसजस्ता एजेन्सीहरुले पनि सम्मेलनमा सहभागी हुने प्रतिनिधिको टुङ्गो लगाइसकेका छन् । 

 

भूकम्पबाट मुलुकका प्रमुख पर्यटकीय गन्तव्य र त्यसका भौतिक पूर्वाधार सुरक्षित रहेका सन्देश प्रवाह गर्नु पनि सम्मेलनको अर्को उद्देश्य हो । सम्मेलनका सहभागीलाई भूकम्पबाट क्षतिग्रस्त ऐतिहासिक संरचना, विश्वसम्पदा सूचीमा सूचीकृत मठमन्दिर, दरबार र प्रभावित केही जिल्लाको स्थलगत अवलोकन गराइने अर्थ मन्त्रालयले जनाएको छ । दातासमक्ष प्रस्तुत गरिने विपद्पछिको आवश्यकता मूल्याङ्कन (पिडिएनए) प्रतिवेदन तयार भइसकेको छ ।