अफगानिस्तानलाई ३-२ को अन्तरले हराएर नेपाल अन्डर १९ च्याम्पियनशिप फुटबलको फाइनलमा

नेपाल पहिलो साफ अण्डर १९ च्याम्पियनसिप फुटवलको फाईनलमा प्रवेश गरेको छ । बलियो प्रतिद्वन्दी अफ्गानिस्तानलाई ३–२ गोल अन्तरले पराजित गर्दै नेपाल उपाधि नजिक पुगेको हो । ललितपुरको सातदोबाटोस्थित एन्फा कम्प्लेक्सको मैदानमा आज भएको पहिलो सेमिफाईनलमा नेपालले उत्कृष्ट खेल पस्किएको थियो । खेलको ३४ औं मिनेटमा सुनिल बलको कर्नर प्रहारमा हेडर मार्फत गोल गर्दै अन्जन बिष्टले नेपाललाई अग्रता दिलाएको थियो । तगत्तै नेपालले पेनाल्टी पायो र अन्जनले नै पोष्टको दिशा दिएपछि नेपाल पहिलो हाफमा २–० को अग्रता लिन सफल भएको थियो ।

 

दोस्रो हाफमा केही आक्रामक रुपमा मैदान उत्रिएको अफ्गानिस्तानले अनन्त तामाङ्गको आत्मघाती गोलबाट ५० औं मिनेटमा खाता खोलेको थियो । तर त्यसको तीन मिनेटपछि डिबक्स नजिक पाएको फ्रिकिकलाई सिधै पोष्टको दिशा दिदै सुनिल बलले नेपाललाई ३–१ को अग्रता दिलाए । ७३ औं मिनेटमा मेहदी रेजाईले नेपाली डिफेन्सको गल्तीको फाईदा उठाउदै गोल गर्न सफल भए । त्यसपछि थप आक्रामक बनेको अफ्गानिस्तानका एकपछि अर्को प्रहार नेपाली गोलकिपर सोजित गुरुङ्ग र डिफेन्स अनन्त तामाङ्गले बिफल बनाएपछि अफ्गानिस्तान सेमिफाईनल चरणबाटै बाहिरियो ।  

नेपालले उपाधिका लागि आजै हुने भारत र बंगलादेशबीचको दोस्रो सेमिफाईनलको विजेतासँग आगामी शनिवार प्रतिस्पर्धा गर्नेछ । भारत र बंगलादेश अपरान्ह साढे ३ बजे एन्फा कम्प्लेक्सको मैदानमा आमने सामने हुनेछन् ।