क्यारेक्टर जन्माउने हाकु काले

 निर्देशकले पात्र जन्माउँछन्, हुलिया र पृष्ठभूमी तयार पार्छन् । कलाकारले त निर्देशकले देखाउन खोजेको पात्रको रूपमा आफूलाई क्यामेरासामु ढाल्ने जमर्को मात्र गर्ने हुन् । निर्देशकको कथामा फिट हुने चरित्र आफैं जन्माउने कल्पनासिल कलाकार अपवाद मानिन्छन् । तीनै अपवादमा पर्छन्, अभिनेता सौगात मल्ल । आफ्ना चरित्र कि आफैं जन्माउँछन् । होइन् भने उनको प्रभावकारी 'इनपुट' रहन्छ नै । लुटको हाकु कालेबाट सुरु भएको उनको यो शैली षड्ङगसम्म आइपुगेको छ ।

सुरज सुनुवार निर्देशित यो फिल्ममा उनी मधेसी मुलको कालु यादवको भूमिकामा देखिदैछन्, जसको ओरिजिल आइडिया सौगातकै हो । निर्देशक सुरज धक नमानी भन्छन्, 'पात्रको नाम मात्र होइन्, पृष्ठभूमि, लुक्स, नक्कली सुनको दाँत, जुंगा घुमाउने सबै आइडिया सौगातकै हो ।' नयाँ प्रयोग गर्न रूचाउने सौगातले यसपटक अवधी र भोजपुरी टोन मिसाएर बोलेका छन् । गुपचुप सुटिङ सकिएपनि फिल्मको ट्रेलर छोटै समयमा यू-ट्युबमा हिट हुनु पछाडिको पहिलो कारण सौगात र उनको संवाद मानिएको छ ।

अनुप बराल, प्रियंका कार्की, विजय लामाजस्ता चिनिएका अनुहारको अभिनय भएपनि ट्रेलरमा सौगात पुरापुर हाबी छन् । सुरजका अनसार सौगातले अहिले निर्वाह गरेको कालु यादव भूमिकाको नाम सुरुमा गाँजले थियो । तर सौगातले स्क्रिप्ट  सुनेपछि पात्रको रूपरेखा पूरा बदलियो । उनले गाँजलेलाई मधेसी मुलको कालु यादव नै बनाउनुको पनि रोचक कारण छ । सौगातको बाल्यकाल नवलपरासीमा बितेको थियो । परासीबजारबाट तीन किलोमिटर भित्र पर्ने नदवा गाउँमा हुर्किएका उनका अधिकांश साथी अवधी, भोजपुरी र हिन्दी भाषा बोल्थे ।

सौगात भन्छन्, 'षड्ङगको स्क्रिप्ट सुन्नासाथ मेरो मनमा रहेको क्यारेक्टर ठ्याक्कै फिट हुन्छ जस्तो लाग्यो । निर्देशकलाई भनें । उहाँ पनि उत्साही हुनुभयो । र, जन्मियो कालु यादव ।' लुटपछि सौगातका ९ फिल्म रिलिज भए । अधिकांश फिल्ममा उनी फरक भूमिकामा देखिए र प्रसंशा पनि पाए तर न कुनै फिल्म व्यावसायिक रूपमा सफल भयो, न हाकु काले नै रिप्लेस भयो । त्यसैले तत्कालका लागि अभिनेताको रुपमा उनको सबैभन्दा ठूलो चुनौती हाकु कालेको ट्रेडमार्क हटाउनु हो ।

(साभार ekantipur)