क्रिस्टीयानो रोनाल्डोको फरक रुप

फुटबल मैदानमा सधैँ स्टाइलिस फुटबलरका रूपमा प्रस्तुत हुने स्टार स्ट्राइकर क्रिस्टियानो रोनाल्डो मंगलबार स्पेनिस राजधानी म्याड्रिडका सडकमा देखिए । रोनाल्डोका लाखौं फ्यान छन् । उनका लागि मरिहत्ते गर्ने लेडिज फ्यानको कमी छैन । तर, मंगलबार उनलाई कसैले पनि चिनेनन् । म्याड्रिडको सडकमा एक सामान्य महिलाले रोनाल्डोलाई आफ्नो फोन नम्बर दिनसमेत मानिनन् । रोनाल्डोले फोन नम्बर माग्दा उनी तर्किएर हिँडिन् । रोनाल्डो सडकमा हिँडिरहेका महिलानजिक पुगेर उनीहरूको फोन नम्बर माग्थे, तर उनीहरू आफ्नो नम्बर दिन अस्वीकार गर्थे । स्पेनिस क्लब रियल म्याड्रिडका पोर्चुगिज स्ट्राइकर रोनाल्डो फरक गेटअपमा सडकमा निस्किएका थिए । उनी एक व्यापारिक भिडियोका लागि आफ्नो रूप बदलेर सडकमा ओर्लिएका थिए । लामा–लामा दाह्रीजुँगासहित घरविहीन बूढा मान्छेको भेषमा रोनाल्डो म्याड्रिडका सहरमा निस्किएका थिए । 

उनी सडकका खाली ठाउँमा आफ्नो फुटबल कौशल देखाउँदै मानिसहरूसँग नजिकिन खोज्थे । तर, उनलाई देखेर मानिस भाग्थे । अन्त्यमा उनले एक सामान्य बालकलाई अंकमाल गर्दै आफ्नो असली रूप देखाएपछि सबै चकित परेका थिए । रोनाल्डोले आफूले खेलेको बल ती बालकलाई उपहार दिँदै आफ्नो असली रूप सार्वजनिक गरेका थिए । त्यसपछि भने अवस्था फरक बन्यो । उपस्थित सबै रोनाल्डोसँग झुम्मिए । सबै उनीसँग कुरा गर्न नजिकिए । हाल चोटका कारण आराम गरिरहेका रोनाल्डो मंगलबार फरक उद्देश्यका लागि आफ्नो रूप बदलेर सडकमा निस्किएका थिए I 

From jukson.com