विश्वकप छनौटको लागि दोस्रो खेल नेपाल र भारत भिड्दै

 

सन् २०१८ मा रुसमा हुने विश्वकप फुटबल प्रतियोगिताको छनोट खेलमा आज नेपालले भारतको सामना  गर्दैछ।

काठमाडौंको दशरथ रंगशालामा हुने दोस्रो लिगको खेलमा नेपाली खेलाडीहरुले भारतमा भोगेको पहिलो लिगको हारको बदला लिने प्रयास गर्नेछन् ।

अघिल्लो साता भारतको गुवाहिटीमा भएको पहिलो लेगको खेलमा नेपाल २-० ले पराजित भएको थियो ।

आज काठमाडौंमा उक्त नतिजा उल्टाउदै भारतलाई स्तब्ध बनाएर घर फर्काउने नेपालको दाउ छ ।

यसको लागि नेपाली टोली पुर्ण रुपले तयार र सक्षम रहेको मुख्य प्रशिक्षक ज्याक स्टेफानोस्की र कप्तान सागर थापाले बताएका छन् ।

नेपालले विश्वकप छनोट तथा सन् २०१९ को एसिया कप छनौटको दोस्रो चरण प्रवेश गर्नका लागि दोस्रो लेगमा आज भारतलाई कम्तीमा तीन गोलको अन्तरले पराजित गर्नुपर्ने हुन्छ ।

यता, १४ वर्षअघि नेपालको प्रशिक्षण सम्हालिसकेका भारतीय प्रशिक्षक स्टेफेन कन्स्टेन्टाइनले आफ्नो टोली नेपाललाई सजिलै जितेर दोस्रो चरणमा जानेमा ढुक्क नभएको बताएका छन् ।

सन् १९९९ को आठौं दक्षिण एसियाली खेलकुद सागमा नेपाललाई रजत पदक जिताएका स्टेफेनले नेपाली खेलाडीहरु अन्तिम समयसम्म पनि परीणाम उल्टाउन सक्षम रहेकोले यो खेललाई आफुले सहज रुपमा नलिएको प्रतिक्रिया दिए ।

यसैगरी भारतीय टिमका कप्तान सुब्रतो पालले पनि आफुहरु भारतमा हात पारेको २-० को जीत बिर्सीएर आज नयाँ खेलको लागि तयार भएको बताएका छन् ।